Магілёўская абласная бібліятэка імя У.І. Леніна ладзіць выставу да 140-годдзя Якуба Коласа і Янкі Купалы

У музычнай гасцёўні Магілёўскай абласной бібліятэкі імя У.І. Леніна дзейнічае выстава «140 гадоў з дня нараджэння Якуба Коласа і Янкі Купалы», арганізаваная супрацоўнікамі аддзела літаратуры па мастацтву і краязнаўчага аддзела.

— 2022 год асвечаны двума юбілеямі — 140-годдзем з дня нараджэння Якуба Коласа і Янкі Купалы. Самабытных і вельмі розных мастакоў слова звязала і асабістае сяброўства, і літаратурны лёс, а іх творчасць стала крыніцай натхнення для многіх беларускіх рэжысёраў, кампазітараў, жывапісцаў і графікаў, — адзначылі ў бібліятэцы. — На выставе прадстаўлена не толькі літаратурная спадчына вядомых песняроў, але і ілюстрацыі да іх твораў, створаныя знакамітымі мастакамі: Міхаілам Савіцкім і Васілём Шаранговічам.

Міхаіл Савіцкі (1922–2010), якому б сёлета споўнілася сто гадоў, свой «Купалаўскі цыкл» стварыў напярэдадні стогадовага юбілею Янкі Купалы па заказе Дзяржаўнага літаратурнага музея імя Я. Купалы.

—Тут паўстала задача гістарычнага адлюстравання часу ў святле купалаўскай паэзіі. Павінна была быць гістарычная дакладнасць, нават чыста этнаграфічная. Калі гэта, напрыклад, вопратка, то абавязкова беларуская, палатняная, а не шаўковая альбо з бязі. У купалаўскай серыі час давялося паказаць праз бытавыя рэчы, інакш не пакажаш укладу жыцця беларускіх людзей. Галоўнае — трэба было вытрымаць рад купалаўскай паэзіі, — падкрэсліваў мастак.

На выставе прадстаўлены копіі карцін мастака з гэтага цыкла: «Жніво», «Калыханка», «Калгасніца», «На сенажаці», а таксама манументальна-эпічны партрэт Я. Купалы, які лічыцца самым значным у сучасным беларускім жывапісе.

Васіль Шаранговіч (1939–2021) у сваёй творчасці не аднойчы звяртаўся да спадчыны Янкі Купалы і Якуба Коласа. Да юбілейнага выдання паэмы «Новая зямля» Якуба Коласа, выдадзенага ў 2002 годзе, мастак за паўтара года выканаў у тэхніцы акварэлі больш за 90 ілюстрацый. У гэтым яму дапамаглі ўспаміны дзяцінства, веданне рэалій і асаблівасцей традыцыйнага вясковага жыцця.

—Многія гады мне хацелася вярнуцца да «Новай зямлі» — кнігі майго маленства. А выйшла неспадзяванае. Мне прапанавалі зрабіць ілюстрацыі да «Новай зямлі» — і за адзін год! Гэта так адпавядала майму душэўнаму стану і светаадчуванню, што задума зрабіць у дужа сціслы тэрмін 91 акварэль і афармленне кнігі — мне падалася пераадольнай. Я зноў чытаў і перачытваў «Новую зямлю». Ужо не як чытач, а як ілюстратар, — казаў Васіль Шаранговіч.

Больш падрабязна пазнаёміцца з творчасцю Янкі Купалы і Якуба Коласа, пабачыць найбольш яркія работы мастакоў Савіцкага і Шаранговіча можна на трэцім паверсе абласной бібліятэкі ў музычнай гасцёўні да канца года.

Рэд.